Манасчы Салимбай Турсунбаев 62 жашында мезгилсиз дүйнөдөн кайтты. Суук кабарды маркумдун шакирти Азиз Биймырза уулу билдирди. Анын айтымында, Турсунбаевдин кан басымы көтөрүлүп кеткен.
Маркум 23-сентябрда Кара-Көл шаарында жерге берилди.
Салимбай Турсунбаев 1959-жылы 13-январда Жалал-Абад облусунун Токтогул районуна караштуу Кайырма айылында туулган. Ал 1986-жылдан тартып «Манас» айта баштаган. Ал тез эле эл оозуна алынып, белгилүү манасчылардын сабына кошулган.
Манасчы Жалал-Абад облусунун Кара-Көл шаарында жашап иштеген. Кара-Көл шаардык Маданият үйүнүн усул бөлүмүндө башкы усулчу, «Балдардын атайын билим берүү борборунда» «Манас сабагы» боюнча мугалим болуп иштеп, артынан шакирт ээрчитип, жаш манасчыларды таптап келген.
Турсунбаев 1992-жылдан баштап «Манас» айтуу боюнча кароо сынактарга катышып жеңүүчү болгон. Ошондой эле, ал «Маданияттын мыкты кызматкери» төш белгисинин ээси. Кыргыз тилине кошкон салымы үчүн мамлекеттик деңгээлде диплом менен сыйланган.
