Экономика жана финансы министрлигинин басма сөз кызматы Эл аралык валюта фонду Кыргызстандын уюмдун алдындагы 12,6 млн доллар карызын кече турганын билдирди.
Алардын маалыматы боюнча, мындай чечимди валюта фондунун кеңеши 2021-жылдын 6-октябрында кабыл алган. Бир гана Кыргызстан эмес, фонддун кеңеши оор кырдаалдын алдын алуу жана жеңилдетүү фонду аркылуу дагы 23 өлкөнүн карызын кечет.
Муну менен Кыргызстандын 2021-жылдын 8-октябрынан тартып 2022-жылдын 10-январына чейинки аралыкка эсептелинген ЭВФтин алдындагы 12,6 млн доллар карызы кыскарат.
«Карыздын кечилиши каржы ресурстарын бошотуп, COVID-19 пандемиясынын таасирин жумшартуу максатында каражаттарды саламаттык сактоо тармагы менен экономикалык колдоого бөлүштүрүүгө мүмкүнчүлүк берет», — деп белгилешти министрликтен.
Кыргызстандын мамлекеттик карызы 2021-жылдын февраль айында 5 млрд долларга чукулдаган.
Кыргызстан кимге карыз?
Каржы министрлигинин маалыматы боюнча, өлкөнүн тогуз кредитору бар, алар менен эки тараптуу жеңилдетилген милдеттенмелер байланыштырат.
Алардын ичинен эң чоңу — Кытайдын Экспорттук-Импорттук банкы. Ага мамлекеттик тышкы карыздын 41,8% же 1 766,00 млн доллар туура келет.
Кыргызстанда эки өнөктөшү менен эки тараптуу жеңилдетилген милдеттенмелер бар. Бул Даниянын Экспорттук-Кредиттик фонду (2,60 млн доллар) жана Германиянын Гермес Кредитверзихерунгс-Актингезельшафт (5,68 млн доллар). Алардын ар бирине тышкы карыздын 0,1% туура келет.
Кыргызстандын ондогон уюмдар жана бирикмелердин алдында көп тараптуу жеңилдетилген милдеттенмелери бар. Баарынан дагы бул категорияга Эл аралык өнүгүү ассоциациясынын алдындагы карыз кирет [МАР - Дүйнөлүк Банктын тобу] — 677,43 млн доллар же жалпы тышкы карыздын 16,1%ын түзөт.
Бул категориядагы карыздар боюнча экинчи орунда Азия өнүктүрүү банкы турат. Ага Кыргызстандын тышкы мамлекеттик карыздын 14,3% же 605,40 млн доллар туура келет.Үчүнчү орунда Эл аралык валюталык фонд, мамлекеттик карыздын 8,9%ы же 376,38 млн доллар ага туура келет.
Мындан тышкары Европа өнүктүрүү жана реконструкция банкы деген дагы кредитор бар, анын алдында Кыргызстанда көп тараптуу жеңилдетилген милдеттенмелери бар. Ага мамлекеттик карыздын 1,2% же 50,23 млн доллар туура келет.
