Казакстандын аймагынан чыгып кетүүгө аракеттенген 300гө чукул куралчан киши кармалды. Бул тууралуу коңшу өлкөнүн ички иштер министри Эрлан Тургумбаев 9-январда маалымдады.
«Алардын жанынан ок атуучу курал, уурдалган баалуулуктар, анын ичинен уюлдук телефондор, казак жана чет өлкөлүк валютада ири суммадагы акчалар табылды», — деди ал.
Тургумбаев колго түшкөндөр Казакстандын чек арасынан унаа аркылуу жана жөө чыгып кетүүгө аракеттенгенин белгиледи.
Казакстандын ИИМинин маалыматына ылайык, 9-январга карата массалык башаламандыктарга катыштыгы бар делген шек менен 5 135 киши кармалган. Күч органдары жалпысынан 125 кылмыш ишин козгогон.
Коңшу өлкөнүн бийлиги 7-январдан тарта кыргыз-казак чек арасындагы жети өткөрмө бекеттин бешөөсүн убактылуу жапкан. Буга Казакстандын «Бирдиктүү маалыматтык тутуму жарактан чыкканы» себеп болгону айтылган.
Ал эми Кыргызстандын Чек ара кызматы учурда Чүй облусундагы «Чалдыбар — Автожол» жана Талас облусундагы «Чоң-Капка — Автожол» пункттары «COVID-19га байланыштуу болгон чектөөлөрдү эске алуу менен» штаттык режимде иштеп жатканын билдирген.
ТЕМА БОЮНЧА:
