Адам өлтүрүүгө шектелип 11 жылдан бери издөөдө жүргөн кыргызстандык жаран Москвада кармалды. Бул тууралуу Ички иштер министрлигинин басма сөз кызматы 31-январда билдирди.
Маалыматка ылайык, 2010-жылдын 17-июнунда Ош облусунун Араван райондук милициясына Дадахан айылынын пахта талаасында азиат түспөлүндөгү, 25-30 жаштардагы белгисиз аялдын сөөгү табылганы тууралуу маалымат түшкөн.
Алгач милиция кызматкерлери аял 2010-жылдагы июнь окуясынын кесепетинен каза болгон деп ойлошкон, бирок кийин кылмыштын башка жагдайлары аныкталган.
Сөөктү кароо учурунда каза болгон аял башынан жаракат алганы, колу-бети жабыркаганы аныкталган. Соттук-медициналык экспертиза маркумдун баш сөөгү, кабыргалары сынган деген жыйынтык чыгарган.
Ал Мамлекеттик каттоо кызматынын Транспорт каражаттарын каттоо башкармалыгынын кызматкери 1980-жылы туулган Алия Темирбаева болгон.
Маалым болгондой, 2010-жылдын май айында айрым криминалдык элементтер анын батир алуу максатында ири суммадагы акчасы бар экенин аныкташкан.
«2010-жылдын 10-июнунда белгисиз адамдар аялды ээн жерге алдап алып кетишкен. Ал жерден ага кол салышкан: физикалык күч колдонуп, электрошокер менен коркутуп, 10 000 АКШ доллары өлчөмүндө акча талап кылышкан. Опузалап талап кылгандар көздөгөнүнө жетпей, алтын-күмүш буюмдарын алып кетип, аялды өлтүрүп, сөөгүн Кара-Суу районундагы каналга ыргытышкан», — деп айтылат ведомствонун билдирүүсүндө.
Ички иштер министрлиги аялдын сөөгү бир жумадан кийин 2010-жылдын 17-июнунда табылганын билдирди.
Кылмышка тиешеси бар адамдар кармалып, ар кандай мөөнөткө эркинен ажыратылган. Бирок өлтүргөндөрдүн бири качып кетүүгө үлгүрүп, эл аралык издөөгө алынган.
Бир күн мурун, 2022-жылдын январында Араван РИИБи Кыргызстандын Ички иштер министрлигинин Орусиядагы өкүлчүлүгүнө издөөдө жүргөн жарандын мүмкүн болгон жери тууралуу маалымат берген. Натыйжада 2022-жылдын 21-январында издөөдө жүргөн 1988-жылы туулган Айтиев Тилек аттуу жаран кармалган.
Москва райондук сотунун чечиминин негизинде кармалган жаран СИЗОго киргизилген. Аны экстрадициялоо маселеси каралууда.
