23-мартта ИИМдин отставкадагы полковниги «баңгизатты мыйзамсыз жүгүртүүгө» шектелип кармалды. Бул тууралуу УКМКнын басма сөз кызматы билдирди.
Атайын кызматтан шектүү «баңгизат саткандарды коргоп, аларды чек арадан өткөрүп жүргөн» деп белгилешти.
УКМК буга чейин кыргыз-казак чек арасынан 11,51 килограмм баңгизатын алып өтүүгө аракет кылган «А.М.А.» жана «К.К.М.» аттуу эки кыргызстандыкты кармаган. Алардын «О.А.Ы.» аттуу дагы бир шериги кармоо учурунда качып кетип, кийинчерээк колго түшкөн.
Тергөөнүн жүрүшүндө бул ишке «Р.Ю.М.» аттуу милициянын отставкадагы полковнигинин тиешеси бар экени аныкталган.
Шектүүнүн үйүн тинтүү учурунда баңгизат табылган. Ага карата «Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо» беренеси менен кылмыш иши козголду.
Учурда шектүү Талас ОИИБдин убактылуу кармоочу жайына киргизилип, тергөө уланып жатат.
23-мартта Ысык-Көл облусунда баңгизат ташып бараткан Түп районундагы Тасма айылынын тургуну кармалган. Шектүүнүн унаасын тинтүү учурунда 21 даана ширенкенин кутучасына салынган 285 грамм жапайы кендирдин жыты бар зат табылган. Ал Каракол шаардык сотунун чечими менен эки айга камалган.
Автору: Айганыш Амирова
Редактору: Найзабек Мукамбетов
