Борбордук шайлоо комиссиясы (БШК) 10-апрелде Кыргызстандын үч шаарында жана 13 айылында өткөн жергиликтүү кеңештин депутаттарын шайлоонун алдына ала жыйынтыгын чыгарды. Шайлоо Жалал-Абад, Ысык-Көл, Нарын, Ош жана Чүй облустарында өттү.
БШКнын маалыматына ылайык, шайлоого 157 958 адамдын тизмеси киргизилип, алардын ичинен 52 363 (33%) шайлоочу добуш берүүгө катышкан.
Алдын ала маалыматтарга караганда, Кара-Балта шаардык кеңешине төмөнкүлөр өттү:
- «Ишеним»;
- «Күчтүү коом»;
- Социал-Демократтар;
- «Ыйман нуру»;
- «Альянс»;
- «Эламан».
Таш-Көмүр шаардык кеңешине алдын ала үч партия өттү:
- «Жаштар»;
- «Ынтымак»;
- «Ата Журт Кыргызстан».
Токтогул шаардык кеңешине, алдын ала жыйынтык боюнча, жети партия өтүп жатат:
- «Ата-Журт Кыргызстан»;
- «Тынчтык»;
- «Ынтымак»;
- «Бирге-Вместе»;
- «Мекен ынтымагы»;
- «Ишеним»;
- «Эл Үмүтү».
Добуштардын акыркы жыйынтыгын БШК 30-апрелге чейин, бардык даттануулар жана талаштар каралып чыккандан кийин жарыялайт.
Жергиликтүү кеңештерде өткөн шайлоого 1 318 талапкер катышкан, алардын ичинен 336 талапкерге мандат тиет.
«Үч шаардык кеңешке жалпысынан 93 депутат шайланыш керек. Шайлоого 13 партиядан 827 талапкер катталган. 13 айылдык кеңештеги депутаттык мандаттардын жалпы саны — 243тү түзөт, анын ичинде округдарда аялдар үчүн 96 мандат резервде калтырылган, 491 талапкер анын ичинде 160ы аял талапкер», — деп билдирген БШК.
