Нарын шаарында 16 күндөн бери изделип жаткан 80 жаштагы кишинин сөөгү 15-июлда дарыянын жээгинин табылды. Бул тууралуу өзгөчө кырдаалдар министрлигинин басма сөз кызматы кабарлады.
Мекеменин маалыматына ылайык, маркумдун сөөгүн туугандары табышкан. Издөө иштерине Нарындагы өзгөчө кырдаалдар бөлүмүнүн куткаруучулары жана маркумдун туугандары тартылган. Бирок эч кандай жыйынтык болбогондуктан, издөө иштери убактылуу токтотулган болчу.
Карыяны туугандары аксакал 29-июнда үйдөн чыгып кетип, кайтып келбегенин айтышкан. Издөө учурунда Нарын дарыясынын жээгинен анын кийимдери табылган.
Буга чейин, 6-июлда Баткен облусунун Лейлек районуна караштуу Баул айылында 16 жаштагы өспүрүм сууга чөгүп каза тапкан.
Жерине куткаруучулар барганга чейин, тургундар өспүрүмдүн сөөгүн суудан чыгарышкан. Маркумдун кандай жагдайда сууга түшүп кеткени тууралуу маалымат берилген эмес.
