Бишкек шаарындагы Мурманск менен Садыгалиев көчөлөрүнүн кесилишинде жайгашкан кампа күйүп кетти. Алдын ала маалыматка ылайык, жабыркагандар жок.
Өзгөчө кырдаалдар министрлигинин басма сөз кызматынын маалыматына ылайык, кырсык 30-июлда түнкү саат 03:45 чамасында болгон.
Министрликтен өрттүн аянты чоң болгондуктан өчүрүү иштерине жети бөлүм тартылганын белгилешти. Ошондой эле «Жашылдандыруу» муниципалдык ишканасынын 2 суу ташуучу унаасы, «Газ чарба» кызматы, райондук электр тармактары ишканасынын кошумча бригадасы жана Тез жардам кызматы да иш алып барды.
Өрт эртең мененки саат 07:20 чамасында чектөөгө алынып, учурда толук өчүрүү иштери уланууда. Министрликтин алдын ала маалыматы боюнча, тилсиз жонун кесепетинен болжолдуу 1500-1800 чарчы ментр аянт өрттөнгөн. Учурда келтирилген чыгымдын жалпы суммасы эсептелип жатат.
Үстүбуздөгү жылдын 17-июлунда Чүй облусунун Аламүдүн районунда фермада чыккан өрттөн 223 баш бука, 30 миң түк чөп өрттөнүп кеткен.
Өрт чалган ферманын жалпы аянты болжол менен 2000 чарчы метр экени кабарланган.
