Кызматынан убактылуу четтетилген саламаттык сактоо министри Алымкадыр Бейшеналиевдин мурдагы кеңешчиси Мээрим Тилекова ТИЗОдон бошотулду. Бул тууралуу «Клоопко» адвокат Кайсын Абакиров билдирди.
Жактоочунун айтымында, 4-августта Каракол шаардык соту аны 2022-жылдын 11-сентябрына чейин үй камагына чыгарды.
Адвокат Тилекованын баш коргоо чарасын өзгөртүү боюнча сунуштаманы 3-августта УКМКнын Ысык-Көл облустук башкармалыгынын тергөө бөлүмүнө жолдогонун билдирди.
Мээрим Тилекова 17-майда опузалап пара талап кылууга шектелип кармалган. Соттун 15-июлдагы чечими менен 11-августка чейин камакта калтырылган.
Бейшеналиев өзү Тилекова кармалгандан кийин комментарий берип жатып, пара алуу болбогонун, ал эми акчаны Медайымдардын күнүнө арналган салтанаттык иш-чарага чогултушканын билдирген.
Мындан тышкары, чиновник Мээрим Тилекова анын кеңешчиси экенин четке каккан. Ал министрдин орун басарынын мурдагы катчысы деп ишендирген. Ал эми «күнөөсүз кыздын» кармалышы, министрдин айтымында, — Бейшеналиевге жалган жалаа жабуу аракети болгон. Ошондой эле, чиновник УКМК ага басым жасап жатканын билдирген.
Кийинчирээк, Бейшеналиев өзү дагы кармалган. Ал COVID-19га каршы вакцина сатып алуудагы коррупцияга жана бюджетке 1,5 млрд сом зыян келтирүүгө шектелип кармалган. Бирок 16-июнда Биринчи май райондук соту чиновникти үй камагына чыгарган.
