Өлкөдө Улуттук коопсуздук мамлекеттик комитетинин 50гө жакын жаңы имараты салынды. Бул тууралуу ведомствонун башчысы Камчыбек Ташиев «Регион ТВ» телеканалына курган маегинде айтты.
«Белгилүү болгондой ушуга чейин мамлекеттик комитет [УКМК] каралбай калган. Кызматкерлер жер-жерлерде бирөөнүн үйлөрүндө, имараттардын чекелеринде, бурчунда же бир башка китепканаларда [имаратында] кызмат кылып калышкан. УКМКга бир дагы имарат курулган эмес. Былтыртан бери гана ушул жумушту колго алып, бүгүнкү күндө 50гө жакын УКМКнын имараты курулду», — деди Ташиев.
Ташиевдин интервьюсуна чейин коомчулук менен ЖМКга 2021-жылдын сентябрынан тарта ачыла баштаган УКМКнын 12 гана имараты тууралуу расмий белгилүү болчу. Алардын ачылыш аземдерине Ташиев өзү да, президент Садыр Жапаров дагы катышып келет.
Алсак, Жапаров 24-августта УКМКнын кызматкерлерине жаңы батирлердин ачкычын тапшырган. Чекисттер үчүн көп кабаттуу жаңы үйлөр Бишкек шаарында салынган.
Анда президенттин басма сөз кызматы жаңы турак жай 306 үй-бүлөөгө ылайыкталганын билдирген. Ал болгону 1,5 жылдын ичинде курулган. Бир чарчы метринин баасы 300 АКШ долларын түзгөн.
Материалдын автору: Зулайка Эркимбаева
