Кыргызстандык спортчулар Түркиянын Изник шаарында өтүп жаткан IV Дүйнөлүк көчмөндөр оюндарында спорттун таяк тарыш түрү боюнча үч алтын, бир күмүш жана эки коло байге жеңишти.
Таяк тартыш боюнча байгелүү орунга татыган кыргыз спортчулары:
- Алтын — Азамат Асанов эркектер арасында 70 килограмм салмакта беттешти.
- Алтын — Келдибек Атайбек уулу эркектер арасында 110 килограмм салмакта күч сынашты.
- Алтын — Дилбара Иманканова айымдар арасында 75 килограммга чейинки салмакта таймашты.
- Күмүш — Назия Майлибашева айымдар арасында 75 килограмм салмакта беттеш өткөрдү.
- Коло — Бакдөөлөт Абылов 80 килограмм салмакта таймашка чыкты.
- Коло — Улукбек Ырыспаев 110 килограмм салмакта күч сынашты.
Буга чейин көчмөндөр оюндарында Кыргызстан жаа атуу боюнча эркектер арасындагы командалык мелдеште биринчи орунга чыккан.
Төртүнчү Дүйнөлүк көчмөндөр оюндары 29-сентябрдан 2-октябрга чейин Түркиянын Изник шаарында өтөт. Бул жолку оюндар «Биримдикти жана салтты сактайбыз, келечекке карайбыз!» деген ураан менен өтүп жатат.
Оюндарга 102 өлкөдөн 3 миңден ашык спортчу катышууда. Ал эми Кыргызстандын атынан 148 спортчу барды, алар спорттун 11 түрү боюнча ат салышат.
