Жалал-Абад облусуна караштуу Сузак районунда айыл өкмөттүн мурдагы башчысы менен орун басары жерлерди жеке турак жай үчүн мыйзамсыз сатууга шектелип кармалды. Бул тууралуу УКМКнын басма сөз кызматы 12-ноябрда билдирди.
Маалыматка ылайык, шектүүлөр жер тилкелерин бөлүштүрүп берүү боюнча токтомдорду мыйзамсыз жасап, тургундардан акча алганы белгилүү болду.
Бул боюнча «Документтердин жасалмасын жасоо» беренеси менен иш козголуп, шектүүлөр УКМКнын убактылуу кармоочу жайына киргизилди.
Жерлерди мыйзамсыз сатуу боюнча өткөн жылы Ош облусунун Кара-Суу районунда кылмыш иши козголгон. Анда «Кадастрдын» Кара-Суу районундагы башкармалыгынын мурдагы жетекчисин, Нариман айыл өкмөтүнүн башчысы Нодир Хосиловду, «Кадастрдын» аймактык башкармалыгынын мурдагы жетекчиси Бакыт Баймуратовду, алардын шеригин жана мекеменин Кара-Көл шаары боюнча филиалынын убактылуу башчысы кармалган.
