9-декабрда Баткен облусунун Раззаков шаарындагы көчөлөрдүн бирине кыргыз-тажик чек арасындагы жаңжалдан каза тапкан Равшан Муминовдун ысымы ыйгарылды.
Маалыматка караганда, иш-чарага Чек ара кызматынын Баткен облусу боюнча аскер бөлүктөрүнүн командирлери, өздүк курамы, жергиликтүү бийлик өкүлдөрү жана чек арачынын жакындары катышкан.
Иш-чарада маркумдун өмүр баяны, эрдиктери айтылып, балдарынын сагыныч ырлары окулду.
Равшан Муминов 2019-жылдын 16-сентябрында чыккан куралдуу жаңжалда 41 жашында каза тапкан. Мындан сырткары чыр-чатакта Кыргызстандын 13 жараны жаракат алган.
Чек арачынын артында жубайы, үч баласы жана энеси калды. Муминов курман болгондон кийин «Эрдик» медалы менен сыйланган.
