Жалал-Абад облусунун Сузак районунда үйлөнүү тойдогу кортежде асманга 10 жолу ок чыгарган киши кармалды. Бул тууралуу 20-февралда Жалал-Абад ОИИБден билдиришти.
Буга чейин соцтармактарда аталган окуянын видеосу тараган. Анда үлпөт тойдогу кортежде «БМВ» үлгүсүндөгү унаанын үстүнөн белгисиз жаран ок чыгарган.
Аталган факты Жалал-Абад ШИИБдин электрондук журналына катталып, тергөө иштери башталган. Ал эми ок чыгарган Жалал-Абад шаарынын 28 жаштагы тургуну милицияга алынып келинген.
Териштирүү иштеринде ал өзүнө таандык «Сайга МК-1» куралынан ок чыгарганы белгилүү болгон.
Учурда соттук-баллистикалык экспертиза дайындалып, текшерүү иштери жүрүп жатат.
Автору: Албина Жыргалбек кызы
