Минкабдын төрагасы Акылбек Жапаров менен УКМКнын башчысы Камчыбек Ташиев мурдагы мамлекет башчылары менен өлкөнүн азыркы президентинин жолугушуусуна комментарий берди. Экөө тең аталган жолугушууну жалпы биримдиктин башаты же ага карай кадам деп эсептешет.
Жапаров AKIpress үчүн колонкасында жолугушууну тагдыр чечүүчү жана тарыхый саммит деп атады. Анын пикиринде, Кыргызстанда акыркы эки жылды дароо үч символикалуу окуя болду.
«Эгер Кумтөр — бул экономикалык неоколониализмден бошонуунун символу, Кемпир-Абад — өлкөнүн коопсуздугун бекемдөөдөгү чечүүчү кадам, ал эми Дубайдагы саммит — коомдук кечирүүнүн башаты», — деп жазды ал.Ташиевдин комментарийин «Вечерний Бишкек» басылмасы таратты.
Анын пикиринде, президент болуш жолугушууну «кандайдыр бир пиар же заматта эффект жаратыш үчүн» өткөргөн жок жана анын «бул даанышмандык, айкөл кадамы убакыттын өтүшү менен туура бааланат».
«Жалпысынан айтканда, бул тема менен чагымчылдык кылуу – туура эмес. Президенттин алдына койгон максаты – чыныгы даанышмандык, айкөлдүк кадам. Ал өз элинин уулу, элине кызмат кылат, кандай кадамга барбасын – өлкөбүздүн кызыкчылыгын биринчи орунга коёт. А кимде-ким ызы-чуу салууну, төңкөрүш кылууну көздөп жатса, муну менен алектенбей эле койгула», — деди УКМКнын башчысы.
Дубайдагы жолугушуу
Президент Садыр Жапаров 18-февралда Дубайда Кыргызстандын мурдагы жана бозгун президенттерин чогуткан. Жолугушууга бозгун президенттер Аскар Акаев менен Курманбек Бакиев, экс-президенттер Роза Отунбаева жана Сооронбай Жээнбеков, ошондой эле мурдагы президент Алмазбек Атамбаев катышкан.
Жапаров өзү саясатчыларды Кыргызстандын «ынтымагын бекемдөө үчүн» чогултканын айткан. Анын айтымында биринин артынан бири келген мурдагы өлкө башчылары ачуу кептерди айтып, көкүрөгүндө жүргөн таарынычтарын төгүшүп, эң башкысы — бири-бирин кечиришкен.
Азыркы жана мурдагы президенттердин жолугушуусу өлкөдө кызуу талкууларга жем чачкан. Бакиевди Кыргызстанга алып келүү үчүн аракеттер көрүлүп башталды деген божомолдор айтылган. Буга утурлай эле Алмазбек Атамбаевдин «өлкөдө тынчтык жана биримдикти орнотуу жана Бакиевдердин Кыргызстанга кайтып келиши» — эки башка нерсе, аларды айкалыштыруу «такыр башкача жыйынтык берет» деген комментарийи бул теорияларды ого бетер бекемдеген.
20-февралда Turmush басылмасы 2010-жылы апрель революциясында набыт болгондордун ата-энелеринин жана ошол окуялардын ардагерлеринин кайрылуусун жарыялаган. Алар кайрылууда Бакиевдин кайтышына каршы экендиктерин, эгер ал келе турган болсо башаламандыктар чыгып кетет деп белгилешкен.
Жолугушууну айрым депутаттар да сындап чыгышты. Эл өкүлү Дастан Бекешев Бакиевдин кайтып келиши жөнүндө алгач курман болгондордун үй-бүлөлөрү сөз айтышы керек деп, «Бакиевди реабилитациялоо 2020-жылдары эле башталганын» айтты. Ал эми кесиптеши Адахан Мадумаров эгер мурдагы президенттердин эркиндиги жана жашоосуна кепилдик берилген болсо, анда алар Кыргызстанда эле жолугушса болмок деп белгиледи.
Садыр Жапаров өзү мурдагы мамлекет башчылары менен Дубайдагы жолугушуусу тактан кулатылган Курманбек Бакиевди Кыргызстанга алып келүү максатын көздөбөгөнүн билдирген. Ал Бакиев боюнча соттун чечими бар экенин, эгер келе турган болсо жоопкерчиликке тартыларын кошумчалаган.
Кыргызстанда Бакиев сыртынан 30 жылга эркинен ажыратылган, анын 25 жылын ал күчөтүлгөн тартиптеги түзөтүү абагында өткөрүшү керек.
Тема боюнча: Бекешев: «Бакиевчилерди реабилитация кылуу аракети болуп жатат, бирок андай кыла алышпайт»
