Тажикстандын президенти Эмомали Рахмон «Европа биримдиги — Борбор Азия» саммитине катышуу үчүн Кыргызстанга келет. Бул тууралуу президент Садыр Жапаровдун басма сөз кызматы билдирди.
«Европа биримдиги — Борбор Азия» саммити 2-3-июнда Ысык-Көл облусунун Чолпон-Ата шаарында өтөт. Администрациянын маалыматына ылайык, саммитке Рахмондон тышкары Казакстандын президенти — Касым-Жомарт Токаев, Өзбекстандын президенти — Шавкат Мирзиёев, ошондой эле Түркмөнстандын минкабынын төрагасынын орун басары Нурмухаммет Аманнепесов жана Европа Кеңешинин президенти Шарль Мишель катышат.
Саммитте өлкө башчылары менен Европа Кеңешинин башчысы эки региондун ортосундагы саясий, соода-экономикалык жана маданий-гуманитардык кызматташуунун учурдагы абалын жана келечек пландарын, ошондой эле Борбордук Азия мамлекеттери менен Европа Биримдигинин өз ара аракеттешүүсүн талкуулашат.
Жапаровдун администрациясынан кошумчалашкандай, президент делегация башчылары менен эки тараптуу жолугушууларды өткөрөт. Эртеси, 3-июнда, Садыр Жапаров Европа Кеңешинин президенти Шарль Мишель менен жолугат жана анда кыргыз-европалык өнөктөштүк маселелерин талкуулашат.
Рахмон акыркы жолу Кыргызстанга 2022-жылдын июлунда расмий сапары менен келген. Анда да Жапаров менен Рахмондун жолугушуусу Чолпон-Ата шаарында өтүп, кыргыз-тажик эки тараптуу маселелери талкууланган.
Бирок 2022-жылдын сентябрындагы Кыргызстан менен Тажикстандын ортосундагы чек ара жаңжалынан кийин эки президент тең дээрлик байланыш түзүшкөн жок. Эки тарап тең бири-бирин агрессияга айыптаган, ал эми Москва эки өлкө Жамааттык коопсуздук уюмуна мүчө болгонуна карабастан ортомчу болуп бере алган эмес.
Кыргызстандын ТИМи чек ара жаңжалынан кийин кыргызстандыктарды Тажикстанга барбай турууга бир нече жолу чакырган.
