Кыргызстандык суучул Денис Петрашов 2024-жылы Парижде өтө турган Олимпиада оюндарына жолдомо жеңип алды. Бул тууралуу 20-сентябрда Маданият министрлигине караштуу Дене тарбия жана спорт башкармалыгы билдирди.
Петрашов жолдомону Японияда өткөн сууда сүзүү боюнча дүйнө чемпионатынын жыйынтыгы менен жеңип алды. Спортчу буга чейин 2016-жылы Риодо өткөн Олимпиадада 38-орунду ээлесе, ал эми 2021-жылы Токиодо 18-орунду ээлеген.
Петрашовдун жолдомосу кыргызстандык спортчулар үчүн үчүнчү болуп калды. Буга чейин күрөш боюнча дүйнө чемпионатында Айпери Медет кызы менен Айсулуу Тыныбекова Олимпиадага жолдомо утуп алышкан.
23 жаштагы суучул Петрашов — 2017-2019-жылдардагы сууда сүзүү боюнча Азия чемпиону. Спортчу 2022-жылы июлда Израилде өткөн «Маккабиада-2022» эл аралык мелдешинде брасс стилинде сууда сүзүү боюнча экинчи алтын медалды багындырган. Ошол эле жылы Түркияда өткөн Ислам тилектештик оюндарында да алтын утуп алган.
ТЕМА БОЮНЧА:
Айсулуу Тыныбекова Дүйнө чемпионатында финалга чыгып, Париж Олимпиадасына жолдомо алды
Айпери Медет кызы Дүйнө чемпионатында финалга чыгып, Париж Олимпиадасына жолдомо алды
