«Идеал Хаус» хан сарайлар коттеждерин сатуу боюнча иликтөөнүн автору Элнура Алканова билдиргендей, Кыргызстандын бийлиги ага «банктык сыр жайылтылганына» байланыштуу кылмыш ишинин айынан өлкөдөн кетпөөгө тыюу салган.
Алканова Экономикалык кылмыштарга каршы күрөшүү боюнча мамлекеттик кызматка (ЭККМК) 5-январь күнү саат 11:00дө маектешүүгө келиши керек болчу. Бирок ал Бишкектин тышында жүргөнүнө байланыштуу Алканованын ордуна адвокат барган. Юристтин айтымында, Алкановага тергөө учурунда Кыргызстандан чыгууга тыюу салышкан.
Кылмыш иши журналисттин «Идеал Хаус» хан сарайлар шаарчасындагы коттеждерди сатууга жана бул келишимге «БТА банктын» жетекчилиги менен премьер-министр Сапар Исаковдун тийиштиги бар болушу мүмкүндүгүнө байланыштуу. «БТА банк» Алканованын материалындагы «банктык сыр жайылтылганы» үчүн кылмыш ишин козгоону өтүнгөн.
Ал эми журналист өзү ага өлкөдөн чыгууга тыюу салышканына таң калууда. «Мен түшүнбөй жатам, мага өлкөдөн чыгууга тыюу салуунун кереги бар беле? Мен эмне качып же шектелип жатамбы?» — деп жазган ал өзүнүн фэйсбук барагында.
Алканованын адвокаты «Клооптун» кабарчысына курган маегинде өлкөдөн чыгууга тыюу салынганы боюнча ага маектешүү учурунда тергөөчү билдиргенин жана бул тууралуу ал эч кандай расмий документ албагынын айтты.
«Бул так эмес. Мен конкреттүү документтерди көргөн жокмун», — деди атын атагысы келбеген юрист.
ЭККМК банктык сыр жайылтылган фактысы боюнча 18-декабрда кылмыш ишин козгогон. Алканова материалында «Байланышкан жана биригишкен адамдардын тизмесин» көрсөткөн «БТА банктын» документтерин колдонгон.
Кылмыш ишин козгоону ички иликтөө жүргүзгөндөн кийин «БТА банк» өзү өтүнгөн. Иликтөөнүн натыйжасында журналистке кызматтык маалыматтарды ачыкка чыгарган документтерди банктын кызматкери бергени аныкталган.
ТЕМА БОЮНЧА:
- Каржы полициясы журналист Алканованы маектешүүгө чакырды
- Каржы полициясы журналисттик иликтөөдө «банктык сыр ачыкка чыгарылганы» үчүн кылмыш ишин козгоду
- ММБФ: «Идеал хаусту» сатууда эреже бузуулар болгон эмес
- Өкмөт «Ферганадан» Исаковдун хан сарайлар менен байланышын төгүндөөнү талап кылды
- Прокуратура Исаковдун хан сарайлар шаарчасынын сатылышы менен байланышын жокко чыгарды