Бишкек шаарынын мэриясы калаа тургундарын 29-августта кечки саат 21:30да «Эскерүү шамы» акциясына катышууга чакырды. Иш-чара COVID-19дан кайтыш болгондордун элесине арналат.
Муниципалитет Твиттер баракчасына акциянын жол-жобосун түшүндүргөн видео дагы жарыялады.
«Саат 21:30 да үйлөрүбүздөгү жарыктарды өчүрүп, терезелерди ачып, шамдарды күйгүзүп, каза болгондорду эскерели», — деп жазылат маалыматта.
https://twitter.com/bishkekcityhall/status/1291365376199135237
Буга чейин мамлекет башчысы Сооронбай Жээнбековдун буйругу менен коронавирустан узап кеткендерди эскерүү үчүн 30-июль Улуттук аза күтүү күнү деп жарыяланган.
Ага ылайык, ал күнү маданият мекемелерине жана телерадиокомпаниялар оюн-зоок иш-чараларын жана берүүлөрдү токтоткон. Андан сырткары Кыргызстандын бардык аймагында, ошондой эле чет өлкөдөгү дипломатиялык жана консулдук өкүлчүлүктөрдүн имараттарындагы желектер түшүрүлгөн.
6-августка карата Кыргызстанда коронавирус жуккан 38 659 учур катталып, 1447 киши оорудан каза болгон. Ошол эле маалда 30 099 бейтап сакайды.
