Президенттин милдетин аткаруучу Садыр Жапаровдун басма сөз кызматы президенттик аппараттын маалыматтык саясат бөлүмүнүн башчысы болуп Нургазы Анаркулов дайындалганын кабарлады.
Анаркуловду дайындоо тууралуу жарлыкка Жапаров 30-октябрда кол койду. Боршайкомдун маалыматы боюнча, Анаркулов УКМКнын башчысы Камчыбек Ташиевдин партиялашы, экөө тең «Мекенчил» партиясынан болот.
Мындан тышкары, БШКнын маалыматына караганда, Анаркулов 2010-жылдан бери «Майдан.kg» гезитинин редактору болуп иштеген жана партиянын тизмесинде 47-орунда парламенттик шайлоого аттанган.
Өлкөдөгү ар кыл кызматтарга «Мекенчил» партиясынын мүчөлөрү дайындалган учурлар аз эмес. Жапаровдун буйругу менен УКМКнын башчылыгына 2010-жылы «Мекенчил» партиясын бирге түптөгөн үзөңгүлөшү Камчыбек Ташиевди дайындалган.
Кийин Жапаров алты облустун ыйгарым укуктуу өкүлдөрүн алмаштырган буйруктарга кол койгон. Анткен менен ал бир гана Ысык-Көл облусунун өкүлү, мурда Жапаровду ачык колдоп келген Балбак Түлөбаевди ордунда калтырган.
Ал эми Жалал-Абад жана Нарын облустарында өкмөттүн ыйгарым укуктуу өкүлдөрү катары «Мекенчил» партиясынын мүчөлөрү дайындалган.
