Жогорку соттун атуулдук жана экономикалык иштер боюнча соттук коллегиясынын судьясы «Мыйзамсыз баюу» беренеси менен кармалды. Бул тууралуу 15-декабрда Улуттук коопсуздук мамлекеттик комитетинин Коррупцияга каршы күрөшүү кызматы маалымдады.
УКМК тараткан маалыматта Жогорку соттун судьясы О.К.Т. деп белгилеген. Бул инициал Жогорку соттун судьясы Камил Осмоналиев Турдубековичке туура келет.
Ошондой эле, ведомство судьянын баш коргоо чарасы Биринчи май райондук соту тарабынан каралып, УКМКнын убактылуу кармоочу жайына киргизилгенин маалымдады.
Судья өзүнүн жеке кызыкчылыктарын ишке ашырып, киреше булактары жок болсо да көптөгөн кыймылсыз мүлктөрдү сатып алган. Алардын арасында VIP-шаарчадагы элиталык кыймылсыз мүлктөр, алдыңкы курулуш компанияларынан батирлер, Ысык-Көлдүн жээгиндеги престиждүү пансионаттардан коттедждер, соода борборлорунда коммерциялык объектилер жана люкс-класстагы автоунаалар бар.
Мындан сырткары, судьянын жакындары Бириккен Араб Эмираттарына, Түркияга жана Америка Кошмо Штаттарынын курорттук аймактарына байма-бай каттап турганы аныкталган. Бул жагдайлар УКМК тарабынан жүргүзүлгөн сот системасындагы коррупциялык багыттагы кылмыштарды алдын алуу жана жок кылуу боюнча иш чаралардын алкагында аныкталган.
«О.К.Т. өзүнүн чечими менен Максим Бакиевдин үй-бүлөсүнө тиешелүү мүлктүн бир бөлүгүн улутташтыруу боюнча Убактылуу өкмөттүн декретин жокко чыгарып, Мамлекеттик казынага көп миллиондогон чыгым келтирген. Ошол эле учурда, жогорудагы чечими үчүн О.К.Т. улутташтырууга жаткан мүлктүн бир бөлүгүн сый акы катары өзүнө алып алган», — деп маалымдады УКМК.
Ошондой эле, кармалган судья мыйзамсыз тапкан кыймылсыз мүлктөрүнүн изин жашыруу максатында аларды киреше булактары жок болгон башка жарандарга каттатып келген. Сотко чейинки териштирүүнүн алкагында судья коммерциялык ишканалардын бирине биргелешкен ишкерлик жүргүзүү максатында декларацияда көрсөтүлбөгөн 150 миң АКШ долларынан ашык каражат берген.
Буга чейин 12-ноябрда УКМК Ош облусунун улук прокурору Улукбек Өмүрзаковду Оштогу көмүр казган «Жол-Чырак и Ко» компаниясын рейдерлик басып алууну уюштурууга айыптап кармаган. Бирок Өмүрзаков кенди басып алуу боюнча айыпты четке каккан. Улукбек Өмүрзаков — ИИМдин башчысынын орун басары Сүйүн Өмүрзаковдун бир тууган иниси.
