Жалал-Абад облусунун Токтогул районунда шектүү 3,618 кг баңгизаты менен кармалды. Бул тууралуу Ички иштер министрлигинин маалымат кызматы билдирди.
Ага ылайык, ИИМдин Баңгизатты мыйзамсыз сатууга каршы күрөшүү кызматы 30-35 жаштардагы киши Токтогулдан Баткенге ири көлөмдө баңгизатына тапшырык бергени боюнча ыкчам маалымат келип түшкөн.
Бул факты Кылмыштар менен жоруктардын бирдиктүү реестрине катталып, сотко чейинки өндүрүш башталган.
Ыкчам иликтөө иш-чараларын жүргүзүү маалында Баткен РИИБдин убактылуу кармоо жайында отурган 32 жаштагы кишинин Жалал-Абаддагы республикалык психиатриялык ооруканада мажбур түрдө дарыланып жаткан бейтап аркылуу баңгизатына тапшырык бергенге катыштыгы бар экени аныкталган.
Кармалган кишинин жанынан табылган кара-жашыл түстөгү затка жүргүзүлгөн химиялык экспертизанын жыйынтыгында ал нашаа экени аныкталган.
Учурда бул ишке катыштыгы бар башка адамдарды издөө аракеттери жүрүп жатат.
Буга чейин өткөн жылдын ноябрында Жалал-Абад шаарында 21 жаштагы тургун 4 килограммга жакын маңзат менен кармалган.
Андан сырткары Ош шаарындагы үйлөрдүн биринен бир килограммдан ашык героин табылган. Маалыматка ылайык, анын баасы 1 млн 139 миң сом, болжол менен 12 миңдей дозаны түзмөк. Шектелип кармалган тургунга «Баңгизат каражаттарын колдонууга көндүрүү» беренеси боюнча кылмыш иши козголуп, камакка алынган.
