![](https://ky.kloop.asia/wp-content/uploads/sites/6/2021/04/maj1.jpg)
![](https://ky.kloop.asia/wp-content/uploads/sites/6/2021/04/maj2.jpg)
Баткен обулусунун Лейлек районунда май куюуучу кампалардын биринен Тажикстандын жасалма номерлүү жеңил унаасына жүктөлгөн 650 литр күйүүчү май табылды.
«Кампага тинтүү иштери 1-апрелде жүргүзүлгөн. Учурда иштин жагдайларын жана бул ишке катышкан адамдарды аныктоо боюнча тергөө иш-чаралар улантылууда», — деп билдирди атайын кызмат.
Аталган факт боюнча УКМК «Мамлекеттик чек арадан мыйзамсыз өтүү» беренеси менен коңшу мамлекеттин эки жаранын кармады.
Бир апта мурун аталган райондо кыргыз-тажик чек чарасынан күйүүчү майды мыйзамсыз алып өтүүгө аракет кылган айдоочулар кармалгандыгы кабарланган. Жүктүн жалпы көлөмү болжолдуу түрдө 8 тоннаны түзгөн.
«Коргончо» чек арасынан коңшу өлкөдө катталган эки «Хюндай-Старекс» унааларынын айдоочуларын текшерүү учурунда, алардын номуру жасалма болгону жана кузовдун ичи күйүүчү май ташууга ылайыкталып жасалганы аныкталган.
Кыргызстанда күйүүчү майга жана азык-түлүккө болгон баа кескин кымбаттап жатат. Мунай сатуучулар ассоциациясынын жетекчиси Канат Эшатов 1-марттагы басма сөз жыйында күйүүчү майдын баасы бул айда 8 сомго чейин кымбатташы мүмкүндүгүн айткан. Мындан улам өлкөдө күйүүчү майдын тартыштыгы жаралган. УКМК тартыштыкты жоюу максатында коңшу мамлекеттерге мунай өнүмдөрүн ташууга тыюу салган.