Кыргызстандын Орусиядагы элчилиги Татарстандын Казань шаарында каза тапкан кыргызстандык кыздын өлүмү боюнча билдирүү таратты.
Маалыматка ылайык, 19 жаштагы Б.к.А ттуу кыз көп кабаттуу үйлөрдүн биринен кулаган. Маркум апасы менен 2021-жылдын март айында Казандан Москвага көчүп келген.
«Окуяны Казань шаарынын Москва районунун тергөө органдары иликтеп жатат. Учурда өлүмдүн жагдайы иликтенүүдө. Элчилик Татарстандын укук коргоо органдары менен байланышта», — деп билдирди элчилик.
Элчилик каза болгон кыздын апасы менен байланышта экенин жана кыздын сөөгү 5-декабрда Москва аркылуу Кыргызстанга жөнөтүлгөнүн кошумчалашты.
«Этикалык нормаларды жана жеке адамдардын укуктарын сактоо максатында айрым фактылар ачыкка чыкпастыгын билдиребиз», — дейт кыргыз элчилиги.
Көп кабаттуу үйдөн кулап кеткен кыргызстандык кыз тууралуу «Казанские ведомости» басылмасы жазып чыккан. Андагы маалыматка ылайык, окуя 30-ноябрда катталган. Алдын ала маалыматтар боюнча кыз өзү жашап жаткан батирден кулаган.
