Борбордук шайлоо комиссиясына мурдагы вице-премьер-министр Элвира Сурабалдиевадан Жогорку Кеңештин депутаттыгына талапкер катары каттоо жөнүндө арыз түштү. Сурабалдиева Бишкектеги №27 Биринчи май бир мандаттуу округунан аттанып жатат.
Бир мандаттуу шайлоо округу боюнча депутаттыкка талапкерлерди көрсөтүү 2022-жылдын 27-январында аяктайт. Каттоо үчүн документтерди БШКга 2022-жылдын 30-январына чейин тапшыруу керек.
Биринчи май жана Свердлов округдарында кайрадан шайлоо 2022-жылдын 27-февралында өтөт.
28-ноябрда өткөн парламенттик шайлоодо аталган эки округда «Баарына каршы» добуш бергендер алдыга чыгып, кайра шайлоо жарыяланган.
Мындан улам, экс-депутат Сурабалдиева бир мандаттуу округдан шайлоого катышуу ниети бар экенин билдирген.
«36 депутаттык орундардын арасында депутат айымдар да болуш керек деп эсептейм», — деп билдирген ал.
Кыргызстанда парламенттик шайлоо 2021-жылдын 28-ноябрында аралаш система менен өткөн. Анын ичинен 54 депутат партиялык тизме менен, 36 эл өкүлү бир мандаттуу округдардан шайланган.
Борбордук шайлоо комиссиясы партиялык тизме боюнча парламенттик шайлоонун жыйынтыгын 15-декабрда тааныган.
Коммисиянын чечими боюнча, Жогорку Кенештин жетинчи чакырылышына 5%дык босогодон өткөн алты партия кирет.
- «Ата-Журт Кыргызстан» — 17,32%;
- «Ишеним» — 13.61%;
- «Ынтымак» — 11.00%;
- «Альянс» — 8.35%;
- «Бүтүн Кыргызстан» — 7.04%;
- «Ыйман Нуру» — 6.17%.
Жогорку Кеңештин жетинчи чакырылышына өткөн депутаттар бүгүн, 29-декабрда ант берип жатат.
