Маданият, маалымат, спорт жана жаштар министри Азамат Жаманкулов 2022-жылы туризмди өнүктүрүүгө бир миллиард сом бөлүнгөнүн билдирди. Министр бул маалыматты 19-февралда «ЗиЛ» лыжа базасында өткөн «Кыргызстан – тоо лыжа жана кышкы эс алуунун өлкөсү – 2022» кайрымдуулук фестивалында айтты.
Жаманкуловдун айтымында, бөлүнгөн акча туристтик базаларды куруу үчүн жер бөлүп берүүгө жана инвесторлорду тартууга жумшалат.
«Туризм тармагында чоң өзгөрүүлөр болот, жаңы долбоорлор ишке ашат. Бүгүнкү күндө көптөгөн туристтик имараттар жеке колго өткөн. Эгерде жеке инвестор өзүнүн инфраструктурасын жакшыртууга инвестиция салууга даяр болсо — мындай пландарды ишке ашырууга мамлекет жардам берүүгө даяр», — деди Жаманкулов.
Ошондой эле, ал Туризм департаменти жаңы лыжа базаларды куруу үчүн ылайыктуу жерлерди издеп жатканын белгиледи.
«Ысык-Көл облусунда “Тоо-лыжа кластери” долбооруна ылайык, жаңы лыжа базалары курула турган болжол менен 5 объект аныкталган. Учурда Чүй облусунда лыжа базалары жетиштүү, ал эми Ысык-Көлдө бир гана лыжа базасы бар, ошондуктан кийинки жылы ал жакка көңүл буруу пландалууда. Биз бул долбоорлорду Ысык-Көл облусунда ишке ашыргыбыз келет. Албетте, башка тармактар дагы каралып жатат», — деди Жаманкулов.
Улуттук статистика комитетинин маалыматы боюнча, 2020-жылы Кыргызстанга дээрлик 464 миң турист келген. Бул көрсөткүч 2019-жылы келген туристтердин санына салыштырмалуу дээрлик эки эсе аз болгон, анткени ал жылы 2019-жылы өлкөгө 1 млн 779 миң турист келген.
