Ош облусунун Ноокат районундагы Көк-Бел айылынын эки тургуну жана алардын 9 жаштагы небереси иске ууланып каза болду. Бул тууралуу «Клоопко» Ош ОИИБдин басма сөз кызматы билдирди.
Маалыматка ылайык, окуя 21-февралга караган түнү болгон. 63 жана 62 жаштагы жубайлар өз үйүндөгү жертөлөдө жайгашкан от жагуучу бөлмөдө уктап жаткан жеринде көмүр газына ууланып каза табышкан.
Милиция соттук-медэксперттер менен кошо сырттан кароо жүргүзүп, алардын денесинен зомбулуктун белгилерин байкаган эмес.
Ал эми маркумдардын жакындары эч кимге арыз-доосу жок экенин билдиришкен.
2021-жылдын ноябрында Жалал-Абад облусунун Сузак районунда 6 жашар кыз жана 4 жаштагы эгиз балдар иске ууланып каза болушкан. Ал эми балдардын 23 жаштагы энеси оор абалда аймактык ооруканага түшкөн.
Ал эми өткөн жылдын башында Сузактын Кашка-Терек айылында аял үч баласы менен иске ууланып каза болгон. Чарчап калган наристелердин бирөө 5 жашта, экөө 3 жаштагы эгиз балдар болгон.
Маркумдун жолдошу Орусияда 2018-жылдан тарта эмгек миграцияда иштеп жүргөндүктөн, аял үйүндө кайнене жана кайнатасы менен жашаган.
