Украинадагы согушта каза болгон Рустам Зарифулиндин сөөгү 27-мартта өзү туулуп-өскөн Кара-Балта шаарында жерге берилди. Маркумду акыркы сапарга узатуу зыйнатына Кыргызстан менен Орусиянын аскер кызматкерлери жана жакындары катышты.
![](https://ky.kloop.asia/wp-content/uploads/sites/6/2022/03/1333941.7658d6f844b2614a4f9042710cf4d6d0.jpg)
![](https://ky.kloop.asia/wp-content/uploads/sites/6/2022/03/1333942.9c6c4e813739019ae379eb45ededb80c.jpg)
![](https://ky.kloop.asia/wp-content/uploads/sites/6/2022/03/1333944.04f4f1d197999106af5e0b8d77a91a99.jpg)
Маалыматка ылайык, 26 жаштагы кыргыз атуулу Зарифулин 14-мартта каза болгон. Маркумдун сөөгү 26-мартта Канттагы Орусиянын аба базасы аркылуу Кыргызстанга алынып келген.
Зарифулин Кара-Балта шаарында туулуп-өскөн. Мектепти бүтүргөндөн кийин Орусиянын жарандыгын алып, аталган өлкөнүн армиясында келишимдик негизде кызмат өтөп жүргөн. Анын ата-энеси жана бир туугандары Кара-Балта шаарында жашайт.
Орусия Украинадагы согушта Кыргызстанда туулган эки кишинин каза болгонун тастыктады. Буга чейин 25-мартта Ысык-Көл районунун Кара-Ой айылында 19 жаштагы Эгемберди Дорбоевдин сөөгү жерге берилген. Ал 2021-жылы күзүндө орус армиясына кызмат өтөөгө чакыртылып, кийин Украинадагы согушка жиберилген.