Таласта Жол кыймылынын коопсуздугун камсыздоо башкармалыгынын кызматкери жүк ташуучу унаанын айдоочусуна кол көтөргөнү үчүн иштен алынды. Бул тууралуу «Клоопко» Талас облустук милициясынын басма сөз кызматы билдирди.
Маалыматка ылайык, 26-апрелде милиция кызматкеринин формасын кийген киши жүк ташуучу унаанын айдоочу отурган бөлүгүндөгү адамды башка-көзгө уруп жаткан видео тараган. Анда инспектор сөгүнүп, видеого тарткандарды «тартсын, тим кой» деп айтканын угууга болот.
Бул боюнча милиция иликтөө иштерин жүргүзүп, окуя кыргыз-казак чек арасына жакын Чоң-Капка аймагында болгонун аныкташкан. Ал эми формачан киши Талас ОИИБдин Жол кыймылынын коопсуздугун камсыздоо башкармалыгынын өкүлү экени белгилүү болгон.
«Кызматкердин профессионалдык этикасын бузган милициянын капитаны М.М. кызматтан алынды», — деп билдиришти облустук милициядан.
Аны менен катар Таластагы Жол кыймылынын коопсуздугун камсыздоо башкармалыгынын улук инспекторуна катуу эскертүү берилди.
2020-жылы Ош шаарында ИИМдин кызматкери жол талаша кетип айдоочуга травматикалык тапанчадан ок чыгарган. Окуя болгон жерге ыкчам-тергөө тобу чыгып, ок атуучу травматикалык тапанчанын гильзасын тапкан.
Арыз ээсине денесинен алган жараатын аныктоо максатында соттук-медициналык экспертиза дайындалган. Ал эми иш Ош шаардык прокуратурасына жөнөтүлгөн.
