Талас облусунун Кара-Буура жана Бакай-Ата райондорунда бир күндө төрт өспүрүм сууга чөгүп кетти. Үчөөнүн сөөгү табылып, бирөө изделип жатат. Бул тууралуу Өзгөчө кырдаалдар министрлигинин басма сөз кызматы билдирди.
![](https://ky.kloop.asia/wp-content/uploads/sites/6/2022/06/289482167_404588451713887_9127796658524754262_n-1.jpg)
![](https://ky.kloop.asia/wp-content/uploads/sites/6/2022/06/288526347_404588448380554_805667488275426004_n.jpg)
![](https://ky.kloop.asia/wp-content/uploads/sites/6/2022/06/289654793_404579358381463_1437575959113825159_n.jpg)
![](https://ky.kloop.asia/wp-content/uploads/sites/6/2022/06/289119948_404579381714794_3455719386101877424_n.jpg)
Мекеменин маалыматына ылайык, 24-июнда ӨКМге Кара-Буура районундагы Киров суу сактагычына 13 жана 11 жаштагы эки бала чөгүп кеткендиги тууралуу маалымат түшкөн. Алар Үч-Булак айылынын тургундары болгон.
Жерине Кара-Буура райондук өзгөчө кырдаалдар башкармалыгынын үч куткаруучусу барып, балдарды таба алышкан эмес. Ал күнү издөө иши убактылуу токтотулган. Ал эми 25-июнда саат 9:30 чамасында куткаруучулар эки баланын сөөгүн таап, туугандарына өткөрүп берди.
24-июнда министрликтин ыкчам кызматына Бакай-Ата районунун Ак-Дөбө айылынын тургуну Талас каналына 14 жана 13 жаштагы эки кыз чөгүп кеткенин кабарлаган.
Издөө ишине Бакай-Ата райондук өзгөчө кырдаалдар бөлүмүнүн 10 куткаруучусу тартылган. Жергиликтүү тургундар бир кыздын сөөгүн 25-майда эртең мененки саат 8:30да табышкан. Экинчиси изделип жатат.
Өзгөчө кырдаалдар министрлиги чоңдордон өспүрүм балдарды көзөмөлүсүз сууга түшүүгө жибердөөнү эскертти.
Үстүбүздөгү жылдын май айында Өзгөн районундагы Кызыл-Октябрь айылынын 14 жана 15 жаштагы тургундары Кемпир-Абад суу сактагычына чөгүп кеткен. Балдардын сөөгүн айылдаштары ошол эле күнү кечки саат 22:30 чамасында суудан алып чыгышкан.