Баткен облусунун Кадамжай районундагы үйлөнүү тойдо тамакка уулангандардын саны 108 адамга жетти. Бул тууралуу «Клооптун» журналистине Оорулардын алдын алуу жана мамлекеттик санитардык-эпидемиологиялык көзөмөл департаментинен билдиришти.
Мекеменин маалыматына ылайык, уулангандардын ичинен 23 киши ооруканада жатат, алардын экөө жаш бала. Калгандары үй шартында дарыланууда.
Кадамжай районунда массалык уулануу катталганы 31-июлда белгилүү болгон.
Анда департаменттен 89 киши ууланганын айтышкан. Жабыркагандар 30-июлда «Алмаз» кафесинде тойдо болушкан. Үлпөт тойго жалпы 250 киши барган.
«Иш-чаранын менюсунда үч түрдүү салат, дарбыз-коон, мөмө-жемиштер, тоок грили жана ысык тамак болгон. Ошол эле учурда, салаттар менен кайнатылган этти той ээлери өздөрү бышырып, кафеге алып келишкен», — деп билдиришти мекемеден.
1-августта санитардык эпидемиологиялык көзөмөл кызматынын өкүлдөрү кафени текшерген. Ишкананын ээсине укук бузуулар аныкталганы тууралуу протокол жазылып, анын негизинде айып пул салынары айтылган. Кафе убактылуу жабылган.
