Баткенде майрамдык иш-чараларды өткөрүүгө бир жылдык чектөө киргизилди. Бул тууралуу шаардык мэриядан билдиришти.
Мындай чечим 14-17-сентябрдагы куралдуу жаңжалда 63 адам курман болуп, 200дөн ашыгы жаракат алганын, үй-жайсыз калган элдин жаңжалдан кийинки абалын эске алуу менен кабыл алынган.
Облустук, райондук, шаардык деңгээлдеги мамлекеттик маданий оюн-зоок иш чараларын өткөрүүгө чектөө 2023-жылдын 31-декабрына күчүндө болот.
Чектөө киргизилген майрамдар:
- Балаты майрамы;
- Нооруз майрамы (элдик сейилдөө менен чектелсин);
- Кесиптик майрамдар;
- 8-март — Аялдардын Эл аралык тилектештик күнү;
- Акыркы коңгуроо салтанаттары;
- 1-июнь — Балдардын Эл аралык күнү;
- 9-май — Улуу Жеңиш майрамы;
- 31-август — Эгемендүүлүк күнү;
Куралдуу жаңжал
Кыргыз-тажик чек арасындагы ок атышуу 14-сентябрда башталган. Ал эми 16-сентябрда абал курчуп кеткен. Кыргыз бийлиги тажик тарапты «агрессияга жана аскердик кол салууга» айыптаган. Ал эми тажик тарап «эскалацияга» Кыргызстанды күнөөлөгөн.
Жаңжалда кыргызстандын 63 жараны курман болду — анын 48и аскер кызматкери, 15и жергиликтүүлөр. Ал эми 206 адам ар кандай жаракаттарды алды — алардын 145и жоокерлер, 60ы жай тургундар.
Куралдуу жаңжалда 140 миңге жакын адам үйлөрүн таштап качууга аргасыз болгон. Жаңжалдын кесепетинен жалпы 661 үй жабыркады.
Кыргызстанга келтирилген материалдык чыгымдын суммасы 3 млрд 130 миллион сом деп бааланган.
Президент Баткендеги үйлөрдү суук түшкөнгө чейин бүтүрүп берүү тапшырмасын берген. Учурда тургундардын айрымдары үйлөрүнө кайта элек, калгандары чатырларда жана контейнерлерде күн кечирип жатышат.
