Кыргызстандык окуучулар Венгрияда өткөн информатика боюнча эл аралык олимпиадада үч медаль жеңди. Бул тууралуу 4-сентябрда Билим берүү жана илим министрлигинен кабарлашты.
Маалыматка ылайык, 35-жолу уюштурлуп жаткан сынак Венгриянын Зегед шаарында 28-августтан 4-сентябрга чейин өттү. Ага Кыргызстандан төрт окуучу катышып, байгелүү орундарга татыды:
- Күмүш медалга Бишкектеги Чыңгыз Айтматов атындагы лицейдин 11-классынын окуучусу Айдар Мундузбаев ээ болду.
- Коло байгеге Жалал-Абад шаарындагы Курманбек Баатыр атындагы лицейдин 11-классынын окуучусу Тенгиз Беккойонов менен Нарындагы Муратбек Субакожоев атындагы лицейдин 10-классынын окуучусу Алихан Айдарбеков татыды.
- Ал эми Таластагы Манас-Ата лицейинин 11-классынын окуучусу Байтөрө Майрамбеков ардак грамота менен сыйланды.
Эл аралык олимпиадага катышкан Кыргызстандык команданын жетекчиси — Павел Панков. Ал эми окуучуларды сынакка даярдаган мугалим — жетекчинин жардамчысы Кылычбек Ураимов.
International Olimpiad in Informatics — информатика боюнча дүйнөдөгү ири олимпиада болуп саналат. Ага ар бир мамлекеттен төрттөн окуучу катыша алат. Быйыл сынакка 90 өлкөдөн келген 355 окуучу катышты.
