Ысык-Көлдүн Кара-Ой айылындагы «Каухар» пансионатына жакын аймактан 10 гектар жер мамлекетке кайтарылды. Ал жердин наркы 100 миллион сомго тете. Бул тууралуу Башкы прокуратуранын басма сөз кызматы билдирди.
Маалыматка ылайык, Ысык-Көлдүн жээгиндеги 10 гектар жер 1999-жылы 31-мартта Кара-Ой айыл өкмөтү тарабынан Ш.Э. аттуу жарандын жеке менчигине мыйзамсыз берилип кеткен.
«Жер тилкесин мамлекетке алуу максатында облустук прокуратура сот органдарына доо арыз менен кайрылып, ал бардык инстанциялар тарабынан канааттандырылды», — деп жазылат билдирүүдө.
Башкы прокуратурадан билдиришкендей, чара көрүү актысынын негизинде мыйзамсыз менчикке берилип кеткен жер мамлекеттин балансына кабыл алынды.
Үстүбүздөгү жылдын 1-июнунда Ош шаардык прокуратурасы жеке менчикке өтүп кеткен 3,6 млн сомдук жер тилкесин муниципалдык менчикке кайтарган. 2008-жылы Ош мамлекеттик университетине караштуу болгон 154 чарчы метр жер тилкеси А.С. аттуу жаранга менчикке берилип кеткен.
Тема боюнча:
