Октябрь РИИБнин басма сөз кызматы Бишкекте аял киши колдуу болгонун кабарлады. Ушул тапта кылмышка шектүү кармалып, борбор калаанын ИИББдин убактылуу кармоочу жайына киргизилди.
Милициянын маалыматына караганда, 26-августта төртүнчү шаардык ооруканага 40 жаштагы О.С. аттуу аял оор абалда келип түшкөн. Анын башы сөөгү талкаланып, кабыргасы сынып, ошондой эле баш мээсине сокку алганын аныкталган. Жабырлануучу эсине келбестен каза болгон.
Ооруканага келген милиция кызматкерлери аялды 50 жаштагы К.Б. атуу жаран мыкаачылык менен сабаганын аныкташкан.
Аталган факты Октябрь РИИБинде каттоого алынды. «Этиятсыздыктан киши өлтүрүүгө алып келген ден соолукка оор зыян келтирүү» беренеси боюнча соттук чейинки өндүрүш башталды.
Милициянын маалыматына караганда, К.Б аттуу жаран кармалып, Бишкек ШИИББнин убактылуу кармоочу жайына киргизилди.
