Мурдагы саламаттык сактоо министри Алымкадыр Бейшеналиев Чолпон-Ата шаарындагы «Алтын балалык» ден соолукту калыбына келтирүү борборунун директору болуп дайындалды.
Тиешелүү буйрукка саламаттык сактоо министринин милдетин аткаруучу Жаркынбек Касымбеков кол койду. Бул тууралуу маалыматты Касымбеков Фейсбук барагына жарыялады.
«Бүгүн Чолпон-Атада, “Алтын Балалык” ден соолукту калыбына келтирүү борборунун жамаатына жетекчисинин өзгөргөнүнө байланыштуу чогулуш өткөрдүк. Тилек Маткеримова баш болгон “Алтын балалык” жамаатына терең ыраазычылык билдирем. Ушуну менен 9-каттам, жалпысынан 2 миң балдардын ден соолугун чыңдап, реабилитациядан өткөргөнгө жетишишти! Рахмат, сиздерге», — деп жазган ал.
Алымкадыр Бейшеналиев 19-августта президент Садыр Жапаровдун буйругу менен саламаттык сактоо министри кызматынан бошогон.
Ага чейин, 16-августта ИИМ Алымкадыр Бейшеналиевге козголгон кылмыш ишин токтоткон. Анда Бейшеналиевдин жактоочусу кылмыш иши «Алымкадыр Бейшеналиевдин аракеттеринде кылмыштын курамы жок болгонундуктан» кыскартылганын билдирген.
Ошондой эле ал Бейшеналиев саламаттык сактоо министри кызматын кайрадан калыбына келтирүүгө толук укуктуу деп айткан.
Бейшеналиевдин кармалышы
Алымкадыр Бейшеналиев 2-июнда «коррупцияга» шектелип кармалган. Башкы прокуратура чиновникке карата жети кылмыш ишин козгогон.
Көзөмөл органынын маалыматына ылайык, бир кылмыш иши «Коррупция» беренеси боюнча, экөө «Опузалап пара алуу», төртөө «Кызмат абалын кыянаттык менен пайдалануу» жана «Билип туруп пайдасыз контракт түзүү» беренелери боюнча козголгон.
Бейшеналиев коррупцияга жана COVID-19га каршы күрөшүү үчүн вакцина сатып алууда мамлекеттик бюджетке 1,5 млрд сом зыян келтирүүгө шектелген.
Кийин Жапаров саламаттык сактоо министри Алымкадыр Бейшеналиевдин иши боюнча комиссия түзгөнүн билдирген. Өлкө башчысы комиссияны министрге кылмыш иши калыс козголгонбу-жокпу «өзү үчүн билип алуу» максатында түзгөнүн кошумчалаган.
Аны менен катар Алымкадыр Бейшеналиевди саламаттык сактоо министри кызматынан убактылуу четтетип, Жаркынбек Касымбековду министрдин милдетин убактылуу аткаруучу кылып дайындаган.
Кармалгандан кийин Бейшеналиев УКМКнын ТИЗОсуна киргизилген. Бирок 16-июнда сот аткаминерди үй-камагына чыгарган.
