Жалал-Абад шаарында окуучулардын маршруттук каттамдардагы жол акысы 10 сомду түздү. Ал эми пенсионерлердин жол акысы 8 сомдон 15 сомго чыкты. Бул тууралуу «Клоопко» Жалал-Абад мэриясынан билдиришти.
Маалыматка караганда, мындай чечимди шаардык кеңештин депутаттары кабыл алган. Токтом 4-октябрдан тарта күчүнө кирди.
Мэриядан жол акысын жогорулатууну айдоочулар суранганын белгилешти. Алар бааны көтөрүүнү учурда күйүүчү майдын жана унаа тетиктеринин кымбаттаганы менен негиздешкен.
«Учурдагы кырдаалды көрүп, өзгөртүлгөн тарифтерге ата-энелер, жарандар тарабынан өтө деле нааразычылык билдирип, кайрылгандар боло элек. Туура эле түшүнүп жатышат окшойт», — деп белгилешти мэриядан.
2021-жылдын аягынан бери Бишкек баштаган бир нече шаарларда маршруттук каттамдардын жол акылары көтөрүлүп жатат. Айдоочулар буга күйүүчү майдын жана унаа тетиктеринин баасы кымбаттаганы себеп болгонун айтып келишет.
