28-октябрда Жапониянын өкмөтү Кыргызстанга 1 миллион АКШ доллар гранттык жардам көрсөтүү чечимин кабыл алды. Бул тууралуу Кыргызстандагы жапон элчилигине таянып улуттук «Кабар» маалымат агенттиги жазды.
Элчиликтен жардам кыргыз-тажик чек арасындагы куралдуу жаңжалдын кесепетинен өлкөдөгү гуманитардык абалдын начарлап кетишине байланыштуу берилгенин белгилешти.
«Бул жардам аркылуу Жапония өкмөтү БУУнун Бүткүл дүйнөлүк азык-түлүк программасынын жана БУУнун Качкындар боюнча жогорку комиссарлыгынын жардамы менен азык-түлүк, турак-жай жана азык-түлүккө кирбеген товарлар, коргоо сыяктуу багытта гуманитардык жардам көрсөтөт», — деп айтылат маалыматты.
Чек арадагы куралдуу жаңжал
Кыргыз-тажик чек арасындагы ок атышуу 14-сентябрда башталган. Ал эми 16-сентябрда абал курчуп кеткен. Кыргыз бийлиги тажик тарапты «агрессияга жана аскердик кол салууга» айыптады. Ал эми тажик тарап «эскалацияга» Кыргызстанды күнөөлөдү.
Жаңжалда кыргызстандын 63 жараны курман болду — анын 48и аскер кызматкери, 15и жергиликтүүлөр. Ал эми 206 адам ар кандай жаракаттарды алды — алардын 145и жоокерлер, 60ы жай тургундар.
Куралдуу жаңжалда 140 миңге жакын адам үйлөрүн таштап качууга аргасыз болгон. Жаңжалдын кесепетинен жалпы 661 үй жабыркады.
Кыргызстанга келтирилген материалдык чыгымдын суммасы 3 миллиард 130 миллион сом деп бааланды.
Президент Баткендеги үйлөрдү суук түшкөнгө чейин бүтүрүп берүү тапшырмасын берген. Учурда тургундардын айрымдары үйлөрүнө кайта элек, калгандары чатырларда жана контейнерлерде күн кечирип жатышат.
