Жалал-Абад шаарында жаңы асфальт төшөлгөн Пушкин көчөсүнүн ачылышына УКМКнын төрагасы Камчыбек Ташиев катышты. Бул тууралуу 9-августта шаардык мэриядан билдиришти.
Маалыматка ылайык, жолдун узундугу дээрлик эки чакырым, кеңдиги 20 метрди түзөт.
9-агустта пайдаланууга берилген көчөнүн ачылышына Президенттин Жалал-Абад облусундагы өкүлү Абсаттар Сыргабаев, Жалал-Абад шаарынын мэри Эрнисбек Ормоков баштаган жергиликтүү бийлик өкүлдөрү, калаа тургундары катышты.
Аталган көчөнүн курулушу Жалал-Абад шаарын өнүктүрүүгө бөлүнгөн 2 млрд сомдун эсебинен каржыланып, 70 млн сом каражат жумшалды.
Пушкин көчөсү — Жалал-Абад шаарынын негизги жолдорунун бири. Аталган көчө 2018-2019-жылдары кеңейтилип, бирок кеңейтилген бөлүгүнө гана убактылуу асфальт басылган.
Үстүбүздөгү жылы шаарда жалпы 13 чакырым тротуарга жана 20 чакырым жолго асфальт төшөө пландалган.
Ташиев ар кандай объекттердин ачылыш иш-чараларына буга чейин да катышып келген. Өткөн жылы кичи мекени Сузак районуна караштуу Барпы айылында агасы Жаныбек Ташиевдин элесине арналган «Жони» эс алуу багынын ачылышына жана Жалал-Абаддагы төрт көчөнүн оңдоп-түзөөдөн кийинки ачылыш аземине катышкан.
Андан сырткары Ташиев өлкөнүн ар кайсыл аймагында курулуп же оңдоодон өткөрүлгөн УКМКнын ондогон имараттарынын ачып келет. Мындай имараттар өлкө боюнча ондоп саналат.
ТЕМА БОЮНЧА:
Ысык-Көл: Түптө УКМКнын жаңы имараты ачылды
Камчыбек Ташиев Жалал-Абаддагы төрт көчөгө өз чөнтөгүнөн асфальт төшөп берди
Жалал-Абадда 72 млн сомго балдар ойноочу комплекс курулууда
Акылбек Жапаров менен Ташиев Жалал-Абадда УКМКга караштуу балдар лагерин ачышты
