![](https://ky.kloop.asia/wp-content/uploads/sites/6/2021/09/zhalal.jpg)
Жалал-Абад шаарында Спутник кичи районундагы көп кабаттуу үйлөрдүн биринен 28 жаштагы аял асынган абалда табылды. Милиция маркумдун өлүмүнүн чоо-жайын териштип баштады.
Жалал-Абад ОИИБиден «Клоопко» билдиришкендей, маркум 26-сентябрда өзү жашаган үйдөгү газдын түтүгүнө жоолук байлап асынып алган.
Аталган факт КЖБРге «Өзүн-өзү өлтүрүүгө жеткирүү» беренеси менен катталып, соттук-медициналык экспертизалар дайындалды. Учурда тергөө амалдары жүргүзүлүп жатат.
«Турмуш» басылмасы өздүк булактарына таянып, маркум Жалал-Абад шаарындагы мектептердин биринде мугалим болгон деп жазды. Ошондой эле, ал буга чейин «Барпы» театрында эмгектенгенин кабарлашты.
Үстүбүздөгү жылдын 8-февралында Алай районунун Гүлчө айылында 25 жаштагы аял өз үйүндө асынып алган. Маркум мектепте математика мугалими болуп иштеген. Ал эми жолдошу милиция кызматкери болгон. Алдын ала маалымат боюнча маркум окуядан 2-3 күн мурун кесиптештерине балалуу боло албай жүргөнүн айтып кейиген.
Ал эми маркумдун апасы «кызым өзүн-өзү асып албайт эле, териштирип бергиле» деп милицияга арыз жазган. Апасынын айтымында, окуя болгон күнү маркумдун жолдошу үйүндө болгон эмес, иш сапары менен Чоң-Алайга кеткен. Ал «телефондо жаман сөздөр айтылып, кызы менен күйөө баласынын ортосунда чыр чыккан болушу мүмкүн» деп божомолдогон.
Дагы окуңуз:
Алайда 25 жаштагы аял асынып алды. Маркумдун апасы милицияга арыз жазды
Сузакта беш балалуу аял асынган абалда табылды. Маркумдун ата-энеси милицияга арыз жазды
Ош ОИИБи: Төрт баланын энеси жоолукка асынып каза болду, себеби териштирилет