«Кыргызстан» партиясынын лидери, депутат Канат Исаев 18-сентябрда парламенттик шайлоого катышуу ниетин билдирип, бир мандаттуу округдан талапкерлигин көрсөтүү жөнүндө Борбордук шайлоо комиссиясына арыз берди. Исаев шайлоого №31 Чүй-Кемин шайлоо округунан аттанат.
Бир мандаттуу округдардан дагы кимдер катышат?
Депутаттарды бир мандаттуу система менен шайлоо үчүн Кыргызстандын аймагы 36 округга бөлүндү. Округдардын тогузу Ош облусу жана Ош шаарына, жетөө Жалал-Абад облусуна, алтоо Чүй облусуна, төртөө Бишкек шаарына, Баткен жана Ысык-Көл облустарында үчтөн, Талас жана Нарын облустарында экиден берилген.
Шайлоого бир мандаттуу округдардан катыша турган талапкерлер 13-октябрга чейин БШКга арызын бериши керек. Учурда экс-спикер Исаевден сырткары бир мандаттуу округдардан дагы 10 киши шайоого катышуу ниетин билдирген, алар:
- Акылбек Сариев — Боршайкомдун мурдагы төрагасы, № 33 Нарын шайлоо округунан катышат;
- Арсланбек Малиев — экс-депутат, 2017-жылы президенттик шайлоодо 0,1% добуш алган. №34 Жети-Өгүз шайлоо округунан катышат;
- Атамша Дурсунов — жеке ишкер жана түрк диаспорасынын президенти, 2020-жылы жыйынтыгы жокко чыгарылган парламенттик шайлоого «Биримдик» партиясынын тизмесинде болгон. №30 Ысык-Ата шайлоо округунан катышат;
- Санжар Ибраимов — №12 Алай шайлоо округунан катышат;
- Анаш Сейтказиев — коомдук ишмер жана экс-депутат, №31 Чүй-Кемин шайлоо округунан катышат;
- Нурлан Танабаев — муфтийдин милдеттерин мурдагы убактылуу аткаруучусу, №10 Куршаб шайлоо округунан катышат;
- Байыш Курманов — Ысык-Ата районунун мурдагы акими, №30 Ысык-Ата шайлоо округунан катышат;
- Айбек Алтынбеков — «Республика — Ата-Журт» фракциясынын депутаты, №15 Базар-Коргон шайлоо округунан катышат;
- Актилек Нурланбеков — жеке ишкер, №20 Ленин шайлоо округунан катышат;
- Абдижалил Насиров — №3 Кадамжай шайлоо округунан катышат;
- Бакыт Төлөгөнов — Улуттук госпиталдын клиникалык-диагностикалык иштер боюнча башкы дарыгеринин орун басары, №34 Жети-Өгүз шайлоо округунан катышат.
Кыргызстанда парламенттик шайлоо 28-ноябрга дайындалды, ага 592 млн 531 миң сом сарпталат.
Жогорку Кеңештин депутаттарын шайлоо жаңы Конституцияга ылайык аралаш система менен өтөт — 54 депутат партиялык тизме, 36 депутат бир мандаттуу округ менен. Партиядагы талапкерлер «ачык тизме» менен шайланышат.
*«Ачык тизме» же преференциялык шайлоо системасында шайлоочу партияны жана анын тизмесиндеги белгилүү бир талапкерди тандап алуу мүмкүнчүлүгүнө ээ болот. Бул ыкма менен партия жана анын тизмесинде эң көп добуш алган талапкер парламентке өтө алат.
Ошол эле учурда Исаев жетектеген «Кыргызстан» партиясы да парламенттик шайлоого катыша турганын билдирген.
Исаев 2020-жылдын 13-октябрда парламенттин төрагасы болуп шайланган. Ал эми Сооронбай Жээнбеков президенттикти тапшыргандан кийин, өлкө башчынын ыйгарым укуктары Исаевге өтүүсү керек болчу, бирок ал баш тарткан. Мындан улам президенттин милдеттери ошол кездеги премьер-министр Садыр Жапаровго жүктөлгөн.
Ал эми 4-ноябрда Исаев төрагалыктан кетип, президенттик шайлоого катыша турганын билдирген. Үстүбүздөгү жылдын январь айында өткөн президенттик шайлоодо Исаев 0,59% добуш алган.
ТЕМА БОЮНЧА:
